15 Shkurt 2013 - Ambasada PINK/LGBT Pro Shqipëri ka dorëzuar së fundmi pranë zyrës së Avokatit të Popullit propozime për disa ndryshime në Kodin Penal të Republikës së Shqipërisë. Këto propozime synojnë të sjellin disa ndryshime specifike në lidhje me vepra penale të kryera ndaj personave të komunitetit LGBT.

Dokumenti, i paraqitur nga Ambasada PINK vë theksin tek disa nga problemet kyçe që prekin komunitetin LGBT sot në Shqipëri, të tilla si krimet e urrejtjes, nxitja e urrejtjes dhe gjuha e urrejtjes në mediat sociale.

Duke i identifikuar si shumë të domosdoshme, Ambasada PINK ka propozuar që në motivet e kryerjes së një vepre penale (neni 50) përkrah gjinisë, racës, ngjyrës dhe etinsë të shtohen edhe identiteti gjinor dhe orientimi seksual. Përkrah këtij ndryshimi është propozuar që të bëhen shtesa edhe në lidhje me me nxitjen e urrejtjes dhe thirrjeve për urrejtje nacionale (nenet 265 dhe 266) në të cilat të parashikohen si të dënueshme edhe ato që bëhen për shkak të orientimi seksual apo identitetit gjinor të një individi apo grupi individësh.

Stafi i Ambasadës PINK / LGBT Pro Shqipëri u takuan ditën e shtunë, 23 Shkurt 2013, me një grup organizatash që punojnë për të drejtat e komunitetit LGBT në Kosovë. Përfaqësues nga organizatat Libertas Kosova, të cilët ishin edhe organizatorë të udhëtimit studimor të grupit në Shqipëri, Elisum dhe QESH, vizituan zyrat e organizatës me qëllim njohjen nga afër të punës së organizatës dhe shkëmbimin e ideve.

Tiranë, 25 Shkurt 2013 – Ky është viti i pestë që Ambasada PINK/LGBT Pro Shqipëri nis përgatitjet për Festivalin e Diversitetit, që organizohet në 17 Maj 2013, Dita Ndërkombëtare kundër Homofobisë. E shënuar në kalendar si një ndër ditët më të rëndësishme për komunitetin LGBT në të gjithë botën, ajo sjell në kujtesë vendimin e Organizatës Botërore të Shëndetësisë, e cila në këtë datë hoqi homoseksualitetin nga lista e sëmundjeve dhe patologjive.

Festivali i Diversitetit 2013 është një ditë feste, informimi dhe ndërgjegjësimi publik mbi të drejtat e njeriut të komunitetit LGBT, duke dashur të sjellë në vemendje se homofobia është një sëmundje që prek dhe dëmton të gjithë shoqërinë tonë. Vjet Festivali i Diversitetit shkaktoi protesta nga zv.Ministri i Mbrojtjes, Ekrem Spahia dhe disa grupe fetare ekstremiste.

Ditën e Shën Valentinit komuniteti LGBT mblidhet tek Ambasada PINK për të kremtuar ditën e dashurisë. Dhe pse Tirana ofron shumë zgjedhje dhe mundësi ditën e Shën Valentinit, djemtë dhe vajzat e komuniteti LGBT zgjodhën ambjentet e Ambasadës PINK për të diskutuar mbi dashurinë.

Shën Valentinit është një ditë në të cilën kremtohet dashuria dhe të gjithë të dashuruarit i blejnë dhurata, lule njëri-tjetrit dhe dita mbushet plot me detaje të bukura. Dhe në tregimet tona në PINK nuk munguan detajet romantike si lulet, apo poezitë apo format e dashurisë në hapsirat virtuale si në kohë moderne që jemi. Por në disa raste nuk munguan dhe notat e trishtimit dhe nuk vinin për shkak të dhimbjeve të zemrës nga dashuria.

Tiranë, 18 Janar 2013 - Të rinjtë shqiptarë kanë një nivel shumë të lartë paragjykimi dhe intolerance ndaj homoseksualëve, pra thënë ndryshe janë homofobë. Ky fakt, konfirmohet edhe nga një studim voluminor me temën “Rinia Shqiptare 2011: Mes besimit për të ardhmen dhe dyshimit për të tashmen”. Me mbështetjen e Fondacionit gjerman “Friedrich Ebert” studimi ka mbledhur të dhëna gjatë periudhës Shtator-Nëntor 2011 dhe për herë të parë në vendin tonë hedh dritë mbi perceptimet e të rinjve mbi një listë të gjatë fushash, temash dhe çështjesh. Studimi është i ndarë në katër kapituj me temat: “Të rinjtë dhe komuniteti: Besimi dhe Vlerat”, “Familja dhe Lidhjet Shoqërore”. “Arsimi dhe Punësimi” dhe “Shqetësimet dhe aspiratat”.