AMBASADA PINK I PREZANTON PARTIVE POLITIKE MANIFESTIN PËR TË DREJTAT LGBTI NË SHQIPËRI

Tiranë, 12 Qershor 2017 – Ambasada PINK, një ndër organizatat kryesore që punon për mbrojtjen dhe avancimin e të drejtave të komunitetit LGBTI në Shqipëri, filloi sot serinë e takimeve me partite politike në vend, për t’ju dorëzuar dhe prezatuar atyre “Manifestin për të Drejtat LGBTI në Shqipëri”.

Këto takime ndërmerren në kuadër të angazhimit të komunitetit LGBTI gjatë Zgjedhjeve Parlamentare të 25 Qershorit 2017, për të avokuar me partite politike për përfshirjen e prioriteteve të komunitetit LGBTI në programet e tyre elektorale.

Manifesti ju dorëzua sot zyrtarisht znj. Kejdi Mehmetaj- nënkryetare e Lëvizjes Socialiste për Integrim si dhe znj. Floida Kërpaçi- kryetare e Lëvizjes Rinore për Integrim. Në këtë takim u prezantuan pikat kryesore të Manifestit, duke kërkuar përfshirjen e tyre në programin elektoral të kësaj partie me qëllim adresimin e tyre në Kuvendin e ardhshëm.

Ambasada Pink mori mbështetjen e znj. Mehmetaj, ku garantoi që Levizja Socialiste për Integrim do të angazhohet për përfshirjen e këtyre pikave në programin e tyre, duke theksuar që kërkesat e adresuara nga komuniteti LGBTI janë të drejta themelore të njeriut dhe si të tilla duhen garantuar dhe respektuar.

Turi i takimeve të prezantimit të Manifestit për të Drejtat LGBTI do të vazhdojë në ditët në vijim, me partite kryesorenë vend si PS, PD, PDIU, PR, PBDNJ, etj, përfshirë edhe partitë e reja si LIBRA apo SFIDA për Shqipërinë, për t’i bërë aleatë me kërkesat dhe kauzën tonë për çështjen LGBTI.